ما كل صمتٍ خضوع وكل صدِّ انهزام
..
جوزاء يا نجمة سهر، من ساهرك ما يُلام
شعشاع نورك لسجات السهارى.. وفا
ياليتني في سماك، وعايشٍ في سلام
الأرض من عجّته.. شوفي لحقني سفا!
بذرتها طيب، لكن في اراضي لئام
مابين صبخا جحود وبين قاعٍ صفا
جوزاء.. انا شاعرٍ ماني على مايرام
احتاج جرعة قصيده والقصيده شفا
الله يهني عيون اللي عيونه تنام
ويصبر عيون من نومه لجفنه جفا!
البارح الليل راح، ولا هنى لي مقام
ليلٍ هجدني ضجر، يسعى بقلبي حفا
لاعادت الساعة اللي سمعتني كلام
ماقسى من الكلمة الا زفرتي في افا
بعض القرايب عن افعالي تحب الصيام
إن لاح لي نور صيتٍ.. في سماهم طفا!
موج الحسد ليه؟ بقلوب القريبين زام
حنا غفينا.. وابو مره "ترى" ما غفا!
ما كل صمتٍ خضوع.. وكل صدِّ انهزام
هدي النّبي.. نعطي العوجا يا جتنا قفا!
وانا على كثر ضوضاهم.. ما جاهم ملام
صدر الشمالي لزلات القرايب.. رفا
ببقى انا متكل بالله، واشد الحزام
وان جاوب الوقت بالتوفيق.. عني كفا
ما ضر خشم الأصايل ركضها بالعسام
واللي عثر وانتهض.. ماهو مثل من هفا
بُكرى يحقق لي الله مطلبي والمرام
يا بارد الوجه! وجهي جاك منّه دفا
إن طِبت؟ هذي لربعي من خوال وعمام
ولا الردى؟ دربه المشؤوم.. عنّي خفا
تعليقات
إرسال تعليق