الإسراف
انا البارحة شعري خذا رحلة استكشاف
كنيني… وبيّحت القوافي على العاده
لو اقدّم اعذاري.. واكثِر له استعطاف
رفضها.. مثل من يرفض الشاهي الساده
هجوسي.. قضا قاضي، ماينفع به استئناف
وحكمه.. علي نافذ، ولازمني اعداده
وشعر ٍ.. ما هو من قلب؟ يطلع لكم ينعاف!
مثل من.. على الرمضا، طبَخ للعرب زاده
ومادام القرايح.. ترفض الليلة الإنكاف
على من.. سكن قلبي، هماليل رعّاده
على من ملكني حكم بيتر ليوغسلاف
بدا الحرب في قلبي.. وصار الحشى بلاده
قصفني.. بنظراتٍ ، ما تخطي له استهداف
وشبّ الحرايق.. داخل الروح.. وقاده
ودفاع الولع.. برموشه الراجمات ضعاف
بنا مملكة حبّه معي.. وادرك مراده
له الامن.. والآمان، واللين والإنصاف
وانا لي.. خلو الدار، في داخل فواده
أنا واحد ٍ.. ما خالف السلم والاعراف
كتاب ٍ.. قراه اللي شكت عينه رماده
ولا استنزف الغالين.. في حبّي استنزاف
ونسخه.. مثل طبعي، صعب والله ايجاده
انا للغلا فارس… وانا ماني الخواف
اروض عذول الحب.. واناطح جياده
مشاعر .. لكم ترجمتها في جزيل القاف
وفكر شاعر ٍ.. يصعب على كل قصّاده
كتبت الشعر.. واسرفت في ذكركم اسراف
ولا طعت فيك الناس.. والناس نقّاده
رميت العذارى.. عقب حبّك، وراي خلاف
فلا همني “نجلاء”.. ولا همني “غاده”
تراك الشريفة.. عند واحد من الأشراف
رزقني غلاك اللي جعلني من عباده
تعليقات
إرسال تعليق